ZORAM TODAY| Aizawl 14th June, 2024 (Fri): Vawiin Zirtawpni hian Mizo Hnam Run chhung inkhawm neih a ni a. Hun hnihna political session-ah Rajya Sabha MP K. Vanlalvena  chuan thu a sawi.

K.Vanlalvena MP (RS) chuan kan ram dinchhuahna tur chuan Economic Nationalism ngaih pawimawh hmasak ber a tul thu a sawi a. Nationalism nei lo hnam an dinchhuak ngailo a, maruari ho pawh vai sumdawng hausa hming emaw kan ti hial tawh a, hnam hming tih hre lo tam tak kan awm tawh. India ramah sumdawn an thiamin an hausa em em a, UT leh State erawh an nei lo a, Nationalism an neih loh vang a ni, a ti.

K.Vanlalvena chuan, "Hnam ding chhuak tawh sa pawh nationalism an neih loh chuan an buai zel a. Mizote hi political nationalism-ah chuan kan thangharh tawh hle a. Assam, Manipur leh Burma lamah buaina neuh neuh kan tawh changin kan tangrual tha a, economic nationalism-ah erawh kan mit a la keu lo hle a ni. Religious nationalism vawng nung zelin economic nationalism hi kan ngai pawimawh ber tur a ni. Tangka a hausa ringawt hi hausa an ni lo, sorkar hnathawk hlawh pung thur thurin kan per capita income sang hle mahse; vai ram atanga ei tur kan chawkluh theih loh chuan kan nghei a ni mai," a ti.

"Khawvela ram lian apiang economic nationalism-ah an chiang a. Dawr tinah artui an zuar a, vai artui vek a ni. Bawng lah khawchhak lama kan chawkluh hlir a ni a. Kan ramah buh, vaimim leh bekang, an chaw tur pawh a tha duh em em a, economic nationalism-ah hian i harh thar mawlh ang u," a ti bawk.